સંસ્કારી નગરી વડોદરામાં સ્થિત બરોડા હાઈસ્કૂલ શિક્ષણ જગતમાં ઉચ્ચ પ્રતિષ્ઠા ધરાવે છે, જે બરોડા લાયન્સ ક્લબ એજ્યુકેશન ટ્રસ્ટ દ્વારા સંચાલિત છે. બરોડા હાઈસ્કૂલની પાંચ જુદી જુદી શાળાઓ વડોદરાના જુદા જુદા વિસ્તારમાં શિક્ષણ ક્ષેત્રે પોતાની સેવા આપી રહી છે. જેમાંથી એક માત્ર દંતેશ્વર શાળામાં ગુજરાતી માધ્યમ કાર્યરત છે. જ્યાં પૂર્વ પ્રાથમિકથી લઈ ઉચ્ચતર માધ્યમિક વિભાગ સુધીનું શિક્ષણ આપવામાં આવે છે. જેમાં ઉચ્ચતર માધ્યમિક વિભાગમાં વિજ્ઞાન અને સામાન્ય પ્રવાહ બંને કાર્યરત છે.
શાળા વર્ષ 1996 થી શરૂ થઈ ત્યાર બાદ જૂન 2017 થી શાળામાં અત્યાધુનિક સગવડોથી સજ્જ એવી બીજી બિલ્ડીંગ અને હવે જૂન 2022 થી ત્રીજી નવી બિલ્ડીંગનો શુભારંભ થયેલ છે.
શાળામાં વિવિધ આધુનિક સુવિધાઓ જેમ કે, દ્રશ્ય શ્રાવ્ય ખંડ, બે આધુનિક કમ્પ્યૂટર લેબ જેમાં દરેક બાળક દીઠ કમ્પ્યૂટરની સુવિધા, ચિત્રકલા ખંડ, સંગીત ખંડ, વિવિધતમ આઠ હજારથી વધુ પુસ્તકો ધરાવતું પુસ્તકાલય તેમજ સંપૂર્ણ સાધન સામગ્રી, રસાયણોથી સજ્જ એવી જીવ વિજ્ઞાન, ભૌતિક વિજ્ઞાન અને રસાયણ વિજ્ઞાન પ્રયોગશાળાની વ્યવસ્થા છે. આ સાથે ઓડિટોરિયમ તેમજ સી.સી.ટી.વી કેમેરાથી સજ્જ વિશાળ વર્ગખંડો તથા બાળકોના સર્વાંગી વિકાસને ધ્યાનમાં રાખીને વિવિધ રમત – ગમતના સાધનોથી સુસજ્જ રમત ખંડ તેમજ મેદાન કે જેમાં વોલીબોલ, ફૂટબોલ, હોકી, ખો – ખો જેવી રમતો આવરી લીધેલ છે.
બાળકોની સલામતી માટે સમગ્ર શાળા તેમજ શાળા પરિસરને સી.સી.ટી.વી. થી સુસજ્જ કરેલ છે. કે.જી વિભાગના બાળકો માટે પણ તેમની વય કક્ષા મુજબ વિવિધ રમતોના સાધનો, શૈક્ષણિક સાધનો, સેન્ડપીટ, પ્લે એરિયાની સુવિધા પણ છે.
શાળા અટલ ટિંકરીંગ લેબ (ATL)ની સુવિધા પણ ધરાવે છે જેમાં બાળકો પોતાના નવીન વિચારોને અમલમાં મુકીને નવા – નવા અવનવા સ્વયં સંચાલિત સાધનો બનાવે છે. આ શાળામાં બાળકોને પોતાનો સર્વાંગી વિકાસ સાધવા માટે પદવીધર અને કર્તવ્યનિષ્ઠ શિક્ષકો દ્વારા સતત માર્ગદર્શન આપવામાં આવે છે.
શાળામાં નવી રાષ્ટ્રીય શિક્ષણ નીતિ 2020 હેઠળ પ્રવૃત્તિ સાથેના ભણતર પર ભાર મૂકવામાં આવે છે (learning by doing). આ સાથે ઉચ્ચતર પ્રાથમિક વિભાગ માટે વોકેશનલ કોર્સ જેમાં ખેતી અને બાગાયત શિક્ષણ, ઈલેક્ટ્રીકલ, સીવણકામનું પણ આયોજન કરવામાં આવે છે. શાળા દ્વારા મહાવીર ફાઉન્ડેશન ટ્રસ્ટ સાથે મળી, ઉચ્ચતર માધ્યમિક વિભાગના બાળકોની આર્થિક પરિસ્થિતિને ધ્યાનમાં રાખી આર્થિક સહાય પણ આપવામાં આવે છે. ધોરણ-8 અને 10માં જે બાળકનું પરિણામ 75 % થી વધુ તથા વાલીની વાર્ષિક આવક 2,50,000/-થી ઓછી હોય તેવા બાળકો પસંદગીના અભ્યાસથી વંચિત ન રહે તે હેતુસર શાળા મહાવીર ફાઉન્ડેશન ટ્રસ્ટ સાથે સંકળાયેલ છે કે જેઓ આર્થિક રીતે મદદરૂપ થઈ ધોરણ-9 થી 12ના બાળકો માટે શાળામાં જ શાળા સમય બાદ મુખ્ય વિષયોના વધારાના વર્ગોનું આયોજન કરે છે.
આજના વિદ્યાર્થીમાં કિશોરવસ્થામાં આવતા પરિવર્તનો અને પડકારો અંગે સચોટ અને વાસ્તવિક જ્ઞાન આપવા માટે શાળામાં Skill for Adolescent (SFA)નો કાર્યક્રમ નિયમિત અભ્યાસ સાથે આવરી લીધેલ છે. જેમાં વિદ્યાર્થીઓને કિશોરવસ્થાના વિવિધ કૌશલ્યો અંગે માર્ગદર્શન આપવામાં આવે છે.
શાળામાં વડોદરા ઇનોવેશન કાઉન્સિલ (VIC) દ્વારા સંચાલિત તોડ ફોડ જોડ કાર્યક્રમ અંતર્ગત ધોરણ-૬ થી ૮ના બાળકો રોજિંદા વપરાશના સાધનો વિશે સ્વઅનુભવ દ્વારા જાતે કાર્ય કરી માહિતગાર થાય છે.
ઉપરાંત, વર્ષ દરમિયાન વિવિધ પ્રવૃત્તિઓ, મુલાકાતોનું પણ આયોજન થાય છે. ટ્રસ્ટ સામાજિક ક્ષેત્રે પણ ભગીરથ કાર્યો હાથ ધરે છે. કોવિડની પરિસ્થિતિ દરમ્યાન શાળા દ્વારા શ્રમ મંદિર, રામકૃષ્ણ મિશન, બરોડા કાઉન્સિલ સેન્ટર, બાળ કલ્યાણ અને આશાદીપ જેવી સામાજિક સંસ્થાઓમાં શૈક્ષણિક વીડિયો મોકલી ત્યાંના બાળકોને સહાયરૂપ બનવાનો સફળ પ્રયત્ન પણ કરવામાં આવેલ હતો.
શાળામાં FRCના આધારે ફીનું ધોરણ નિયત કરેલ છે. જેના દ્વારા પોષાય તેવી ફીમાં વિવિધ અદ્યતન સુવિધાનો લાભ બાળકોને આપવામાં આવે છે.
શાળાના શૈક્ષણિક સ્ટાફ માટે સમયાંતરે વિવિધ તાલીમ, વર્કશોપનું પણ આયોજન કરવામાં આવે છે.
આ સાથે શાળા ઉત્તમ પર્યાવરણીય સંતુલન ધરાવે છે. પાણીની સગવડતા માટે કૂવો,બોરની સુવિધા પણ છે. વળી પાણીના શુદ્ધિકરણ માટે દસ R.O. પ્લાન્ટ અને કૂલરની સુવિધા છે, જેથી બાળકોને પીવાનું શુદ્ધ પાણી મળી શકે. તેની સાથે વરસાદી પાણીનો સંગ્રહ કરવા માટે રિચાર્જ બોર પણ કરવામાં આવેલ છે. શાળામાં વિદ્યુત ઊર્જાના બચાવના ભાગરૂપે 25 KVની સોલાર પેનલ નાખવામાં આવી છે. આ સૌર ઊર્જાથી શાળામાં વીજ વપરાશ કરવામાં આવે છે.
આમ, વિસરાતી માતૃભાષાને જીવંત રાખી ગુજરાતી માધ્યમના બાળકોને ગુણવત્તાસભર ભણતર સાથે જીવનમૂલ્યોના પાઠ ભણાવતી, અદ્યતન સુવિધા સહિતની વિશ્વસનીય શાળા એટલે જ દંતેશ્વર સ્થિત બરોડા હાઈસ્કૂલ…!